Кина се закани со одмазднички мерки откако американската Федерална комисија за комуникации (FCC) воведе ограничувања за нов увоз на напредни хуманоидни роботи произведени во странство, повикувајќи се на ризици за сајбер-безбедноста.
Кинеското Министерство за трговија побара Вашингтон да ја повлече одлуката, оценувајќи дека таа „сериозно ги нарушува“ билатералните односи меѓу двете земји.
Во соопштението, министерството наведе дека САД „повеќепати ја игнорирале воздржаната позиција на Кина во однос на ограничувањата за производи“ и предупреди дека Пекинг ќе преземе соодветни контрамерки за заштита на своите интереси.
Федералната комисија за комуникации во вторникот соопшти дека, поради сајбер-безбедносни ризици, на листата на ограничени производи за увоз ги додала напредните роботски системи произведени во странство, вклучително и хуманоидните роботи.
FCC не наведе конкретна земја, но соопшти дека ограничувањето се однесува на новите модели, додека уредите кои претходно добиле одобрение ќе можат и понатаму да се увезуваат и продаваат.
Спорот претставува најново заострување во технолошките односи меѓу САД и Кина, кои веќе се судираат околу полупроводниците, вештачката интелигенција, телекомуникациската опрема и напредните технологии.