Предлог-законот за проектот „Скопје – европска престолнина на културата 2028“ е повлечен од собраниска процедура и ќе биде ставен на јавна расправа, изјави во петокот премиерот Христијан Мицкоски.
Тој рече дека лично побарал повлекување на законот за да не останат сомнежи околу транспарентноста на процесот, откако предлогот предизвика реакции во јавноста и кај организациите што ја следат борбата против корупцијата.
„Нема да дозволам да остане каков било сомнеж во кој било процес. Затоа, на мое инсистирање, законот беше повлечен од парламентот. Тој ќе биде ставен на јавна дебата“, рече Мицкоски.
Според него, законот бил подготвен во согласност со препораките и практиките на Европската Унија и треба да ја регулира работата на Фондацијата „Скопје – европска престолнина на културата“.
Мицкоски рече дека проектот бил започнат пред околу една деценија, но дека досега не биле спроведени доволно подготовки, поради што постоел ризик Скопје да ја загуби титулата.
„Владата дојде во ситуација да се соочи со предизвик, а тоа е првпат на некој град да му биде одземена титулата европска престолнина на културата“, рече тој.
Премиерот ги отфрли тврдењата дека со законот директно се избира директор на ново јавно претпријатие. Според него, најпрво треба да функционира фондација која ќе го реализира проектот, а дури во 2029 година е предвидено таа да прерасне во јавно претпријатие.
Тој додаде дека програмските приоритети се утврдени во таканаречената „книга на кандидатурата“, или „bidbook“, подготвена пред неколку години.
Според најавите, во 2027 година треба да бидат организирани културни настани во текот на околу 50 дена, додека во 2028 година програмата треба да се одвива секојдневно.
Мицкоски призна дека јавната расправа може да предизвика доцнење на дел од подготовките, но рече дека Владата ќе се обиде до крајот на годината да ги заврши предвидените обврски.
Предлог-законот претходно беше тргнат од собранискиот дневен ред. Државната комисија за спречување на корупцијата предупреди дека со проектот не смее да се заобиколува Законот за јавните набавки, додека Платформата на граѓански организации за борба против корупцијата побара негово итно запирање.