Дрон влегол во бугарскиот воздушен простор од правец на Романија и експлодирал во близина на пограничното село Кардам, соопшти во саботата бугарскиот премиер Румен Радев.
Во инцидентот нема повредени, ниту е предизвикана штета врз инфраструктурата.
Дронот влегол во бугарскиот воздушен простор во 8:10 часот по локално време и експлодирал во поле со сончоглед во близина на границата со Романија.
Местото на експлозијата се наоѓа на околу еден километар од бугарска компресорска станица на Трансбалканскиот гасовод, кој се протега од Турција кон Украина, и на околу 200 метри од романска компресорска станица.
Радев најави засилување на безбедноста околу стратешките објекти во земјата, како и на надзорот долж бугарско-романската граница.
Областа каде што паднал дронот е обезбедена, а неговиот точен тип треба да биде утврден по испитувањето на местото и остатоците од леталото.
Според Радев, беспилотното летало претходно не било детектирано ниту во бугарскиот ниту во романскиот воздушен простор, што, како што рече, покажува дека откривањето и идентификацијата на дронови останува безбедносен предизвик.
Тој посочи и на доцнење во испораката на високопрецизни радари за бугарската армија и најави дека ќе бидат преземени мерки.
Инцидентот се случува во услови на зголемен број навлегувања на беспилотни летала во воздушниот простор на европските земји, кои западните влади ги поврзуваат со војната меѓу Русија и Украина, зголемувајќи ја загриженоста за способноста на членките на НАТО да се справат со ваквите закани.
Засега нема официјални информации за потеклото на дронот.