Американскиот претседател Доналд Трамп изјави дека САД ќе се воздржат од нови воени удари врз Иран доколку во краток рок биде постигнат договор за прекин на повеќемесечниот конфликт.
„САД се подготвени за напад со воена сила каква што не е видена од Втората светска војна. Сепак, Иран и други земји од Блискиот Исток побараа да се воздржиме од нападите“, напиша Трамп, додавајќи дека одложувањето ќе важи „доколку брзо се постигне договор“.
Според американски медиуми, саудискиот престолонаследник Мохамед бин Салман во телефонски разговор го повикал Трамп да ја намали ескалацијата и да се откаже од новите напади, предупредувајќи дека евентуални удари врз иранската енергетска инфраструктура би можеле да предизвикаат одмазднички напади врз Саудиска Арабија и другите земји од Заливот.
Белата куќа потврди дека разговорот меѓу двајцата лидери се одржал, но не соопшти детали за неговата содржина.
Во меѓувреме, иранскиот министер за надворешни работи Абас Арагчи предупреди дека секој напад на САД или Израел, како и учество на регионални држави во такви операции, ќе биде проследен со „пропорционален одговор“.
Иранските медиуми блиски до безбедносните структури објавија дека евентуални американски напади врз иранската енергетска инфраструктура би можеле да предизвикаат ирански удари врз нафтени полиња во Саудиска Арабија и Обединетите Арапски Емирати, како и врз гасните полиња во Катар и Израел.
Во текот на денот, Кувајт соопшти дека неговата противвоздушна одбрана пресретнала ирански беспилотни летала, додека беа пријавени и два инцидента со трговски бродови во близина на Оманскиот Залив, од кои едниот беше погоден од непознат проектил.
Според американски медиуми, САД и Израел разгледувале можност за заеднички напади врз ирански нафтени рафинерии и електроенергетска инфраструктура, но засега нема официјална потврда дека таква операција ќе биде реализирана.
Изјавата на Трамп претставува нов пресврт во американската политика кон Иран, бидејќи доаѓа само неколку часа по извештаите за можни нови воени операции, а во момент кога дипломатските контакти меѓу регионалните актери повторно се интензивираат.