Владејачката коалиција ВЛЕН ја обвини ДУИ за лицемерие по нејзиното барање за меѓународен надзор врз судскиот процес за случајот „Државна лотарија“, во кој поранешниот прв вицепремиер Артан Груби и уште седум лица се обвинети за злоупотреби со проценета штета од околу 8,2 милиони евра.
Реакцијата следува откако ДУИ го оцени обвинението како политички мотивирано и побара транспарентна постапка и меѓународен надзор.
„Симптоматично е што на ДУИ ѝ е срам да го спомене по име Артан Груби, иако нивната реакција директно се однесува на случајот за кој тој е обвинет“, соопшти ВЛЕН.
Од коалицијата прашаа зошто ДУИ, според нив, молчела речиси две години, а реагирала на денот на поднесувањето на обвинението.
„Правда ќе има за сите. И за оние кои две децении ја злоупотребуваа власта и државните функции за да си ги полнат сопствените џебови“, наведува ВЛЕН.
Коалицијата се повика и на претходните американски оценки за проблемот со корупцијата во земјата и порача дека законот мора да важи еднакво за сите.
„ДУИ треба да разбере едно: законот не признава партиски фотелји, привилегии и политички штитови. Правдата ќе биде еднаква за сите“, се наведува во соопштението.
Основното јавно обвинителство Скопје претходно во четвртокот поднесе обвинение против осум лица во предметот поврзан со Државната лотарија, меѓу кои Груби и поранешниот директор на компанијата Перпарим Бајрами.
Според обвинителството, осомничените во текот на 2023 и 2024 година преземале дејствија со кои биле пречекорени службените овластувања, при што на Државната лотарија наводно ѝ била причинета штета од 507,6 милиони денари, или околу 8,2 милиони евра.
ДУИ претходно оцени дека станува збор за „политичко обвинение за колективна одлука“ и побара постапката да биде целосно транспарентна и под меѓународен надзор.
Обвинувањата во обвинителниот акт допрва треба да бидат докажани во судска постапка.