Пентагон подготвува најмалку четири опции за идното распоредување на американските сили во Европа, кои треба да му бидат доставени на американскиот секретар за одбрана Пит Хегсет до 6 ноември, покажува документ во кој увид имал Ројтерс.
Ревизијата може да има значајни последици за американското воено присуство во Европа и за НАТО, каде во моментов се распоредени околу 80.000 американски војници.
Според документот „Terms of Reference“, опциите треба да содржат различен број војници, нивна географска распределба, брзината со која евентуалните промени би можеле да се спроведат и проценка на трошоците.
Европските сојузници стравуваат дека шестмесечната ревизија, најавена во јуни, може да резултира со значително намалување на американските сили во Европа.
Администрацијата на претседателот Доналд Трамп подолго време бара европските членки на НАТО да преземат поголем дел од товарот за сопствената одбрана.
Клучен состанок до 18 септември
Според документот, највисокиот американски воен командант во Европа треба до 18 септември да учествува на состанок со потсекретарот за одбрана за политика Елбриџ Колби.
На тој состанок треба да бидат разгледани опциите што подоцна ќе му бидат доставени на Хегсет.
Колби, исто така, треба да разговара со амбасадорите на земјите членки на НАТО во седиштето на Алијансата во Брисел.
Висок претставник на Пентагон изјавил дека целта е да се подготви широк спектар на можности.
„Сакаме да можеме да разговараме за предностите и недостатоците на различни нивоа или распореди на силите“, изјавил претставникот за Ројтерс.
Тој додал дека администрацијата се движи кон модел во кој сојузниците ќе ја имаат водечката улога, додека американската поддршка ќе биде „критична, но поограничена“.
Кои земји ќе бидат под лупа?
Ревизијата нема да го разгледува само бројот на американски војници. Пентагон ќе оценува и како поединечните сојузници ги исполнуваат своите обврски кон САД и НАТО.
Меѓу критериумите се трошоците за одбрана, придонесот кон моделот на сили на НАТО, пристапот до воени бази и воздушниот простор, како и поддршката за американските воени операции.
Посебно внимание се посветува на таканаречените права за пристап, базирање и прелетување, односно дали американските сили можат непречено да користат инфраструктура и воздушен простор на сојузничките држави.
Ревизијата ги опфаќа и вселенските и кибернетичките капацитети, разузнавачката инфраструктура и другите системи што им овозможуваат на САД да проектираат воена моќ од Европа кон други региони.
Вашингтон веќе испратил прашалник до сојузниците во кој бара информации за нивните одбранбени трошоци, воени набавки, стратегијата и поддршката за американските надворешнополитички приоритети. Одговорите треба да бидат доставени до петок.
Трамп незадоволен од дел од сојузниците
Трамп во повеќе наврати ги критикуваше европските членки на НАТО дека премногу се потпираат врз американските безбедносни гаранции.
Дополнителна причина за незадоволството на Вашингтон, според Ројтерс, е однесувањето на некои европски сојузници за време на американско-израелската војна против Иран.
Американската администрација смета дека дел од членките не обезбедиле пристап до бази или дозволи за прелетување на американските воени авиони, или тоа го направиле премногу бавно.
Генералниот секретар на НАТО, Марк Руте, претходно рече дека го разбира дел од незадоволството на Трамп, но нагласи дека големо мнозинство од европските сојузници биле од помош.
Хегсет, кога ја најави ревизијата во јуни, обвини дел од сојузниците дека се однесуваат како „бесплатни корисници“ на американската безбедност.
Засега нема конечна одлука за повлекување или намалување на американските сили. Резултатот од ревизијата треба да биде завршен во декември, но првите конкретни опции ќе бидат на масата на Хегсет веќе до 6 ноември.