Лидерот на ДУИ во опозиција, Али Ахмети, изјави дека земјата треба да го одржува „цврстиот и непоколеблив“ став за поддршка на САД и за секоја иницијатива за заштита на мирот, стабилноста и глобалната безбедност.
„Сојузот со САД не е само дипломатска ориентација, туку стратешка и вредносна определба. Тоа е наш избор да стоиме на страната на демократијата, основните слободи, владеењето на правото и меѓународната одговорност“, рече Ахмети.
Тој додаде дека иранските напади и дестабилизирачките акции кои ја загрозуваат безбедноста на земјите од Заливот и кревката мировна архитектура во Блискиот Исток „не служат на никого, ниту на развојот, ниту на соединувањето, ниту на легитимните стремежи за просперитет на народите“.
Ахмети нагласи дека безбедноста во Персискиот Залив и Блискиот Исток е глобален интерес, а слободата на пловидба, енергетската стабилност, борбата против тероризмот и заштитата на меѓународниот поредок се заеднички одговорности. Тој оцени дека улогата на САД останува незаменлива како гарант на рамнотежата и фактор на стабилност.
„Албанците без двоумење ја избраа западната патека. Ние сме дел од алијансата на вредности, дел од евроатлантската заедница и активен придонесувач во колективниот мир и безбедност. Поддршката за САД е поддршка за побезбеден, поисправедлив и послободен свет“, подвлече Ахмети.