СДСМ го обвини премиерот Христијан Мицкоски дека се обидува да создаде лажна дилема меѓу европската интеграција на Северна Македонија и стратешкото партнерство со Соединетите Американски Држави, порачувајќи дека двата процеса се компатибилни и меѓусебно се надополнуваат.
Од опозициската партија оценуваат дека Мицкоски се обидува да го оправда застојот на европскиот пат со теза за посилно потпирање на Вашингтон.
„Членството во ЕУ и стратешкото партнерство со Америка меѓусебно не се условуваат, напротив, се надополнуваат и создаваат синергија во интерес на Македонија, регионот и пошироката европска безбедност“, соопшти СДСМ.
Партијата тврди дека премиерот не успеал да обезбеди напредок во преговорите со Европската унија и дека по претходните ветувања за подобри услови и гаранции сега се обидува да наметне нов политички наратив.
СДСМ го критикува Мицкоски и за, како што наведува, незавршени реформи кои Владата претходно ги најавила како дел од европската агенда.
„Нема ЕУ – вели Мицкоски, премногу им дадовме, а не добивме ништо“, наведува СДСМ, оценувајќи дека таквата политика ја оддалечува земјата од Унијата.
Од партијата реагираат и на изјавите на премиерот поврзани со продлабочувањето на односите со САД и визниот режим, тврдејќи дека тие се користат како замена за напредокот кон ЕУ.
СДСМ оценува дека Северна Македонија не треба да избира меѓу Брисел и Вашингтон.
„На Македонија ѝ е местото во ЕУ, со стратешко партнерство со Соединетите Американски Држави, и така треба да остане“, се наведува во реакцијата.
Партијата оди и чекор понатаму, обвинувајќи го Мицкоски дека зад неговиот однос кон европската интеграција стои страв од посилни европски механизми за контрола и борба против корупцијата.