Пратеничката на ВЛЕН, Саранда Имери-Стафаи, побара објаснување од лидерот на ДУИ, Али Ахмети, по неговата изјава дека поранешниот вицепремиер Артан Груби е невин и дека ќе биде прогласен за невин во судскиот процес за „Државна лотарија“.
„Од каде ти е оваа сигурност? Дали однапред знаеш што ќе одлучи судот?“, праша Имери-Стафаи во реакција објавена на социјалните мрежи.
Ахмети претходно во интервју за А2 Си-Ен-Ен изјави дека Груби е невин и дека очекува судската постапка да заврши без осудителна пресуда.
„Артан Груби е невин и ќе биде прогласен за невин, бидејќи не ги прекршил законите на земјата“, изјави Ахмети.
Имери-Стафаи ја искористи изјавата на Ахмети за да го постави прашањето дали неговата увереност во исходот на процесот отвора сомнежи за независноста на правосудството.
„Ако однапред знаеш како ќе заврши еден судски процес, тогаш мора да прашаме: Дали правдата е независна или некој веќе ја знае пресудата?“, напиша пратеничката.
Таа во реакцијата го спомена и случајот со поранешниот директор на УБК, Сашо Мијалков, барајќи од Ахмети да се произнесе и за американските наводи поврзани со Груби и влијание врз судски процеси.
„Али, не ни кажувај само дека Артан е невин. Кажи ни зошто си толку сигурен!“, порача Имери-Стафаи.
Изјавите доаѓаат додека пред Основниот кривичен суд во Скопје се води постапката за случајот „Државна лотарија“.
Груби се изјасни дека не се чувствува виновен. Обвинителството, пак, тврди дека во случајот биле пречекорени службени овластувања и дека на Државната лотарија ѝ била предизвикана штета од 596.125.511 денари, или околу 9,7 милиони евра.
И другите обвинети ја негираат вината.
Судската постапка е во тек и судот допрва треба да ги изведе и оцени доказите, по што ќе одлучува за евентуалната кривична одговорност на обвинетите.