Премиерот Христијан Мицкоски денеска изјави дека нема дилема околу поддршката на правото на протест, но нагласи дека му пречи кога демонстрантите ги прекршуваат законите.
„Јас секогаш поддржувам протести, демократско право е да се поддржат протести и тука немам никаква дилема. Мене лично ми пречи што протестантите кои се правници кои се борат за право го прекршуваат законот, да речеме законот за знамињата, законот за државната химна, уставот и така натаму“, рече Мицкоски.
Премиерот додаде дека нема да ги коментира навредите упатени за време на протестите.
„Ајде навредите нема да ги коментирам, тоа е сè под домашно воспитување што во првите седум години од животот се стекнува“, изјави тој.
Мицкоски рече дека нема да го коментира ниту насилниот инцидент што се случил, како и, според него, „надворешните мешања во внатрешните работи на Македонија од надворешни фактори“.
„Тоа сè ќе го оставиме како фолклор“, додаде премиерот.
Тој посочи дека Владата работи на трајно решение за проблемите поврзани со барањата на студентите.
„Ние сме одговорна Влада, проблемите се за да се решат. Решивме стотици проблеми, така и овој ќе биде решен“, рече Мицкоски.
Во изјавата, премиерот ја обвини и Демократска унија за интеграција дека во изминатите 20 години не ги решила овие прашања.
„Имаа можност во изминатите 20 години да ги решат овие прашања и за жал ништо не направија, а решаваа лични прашања. Ако споредите, од голтари станаа милионери на грбот на националните пароли и на грбот на луѓето кои мака мачат како од први до први да го поминат месецот“, изјави Мицкоски.