Брзиот развој на вештачката интелигенција отвора нови можности за медиумите, но истовремено ја зголемува опасноста од објавување неточни или недоволно проверени информации. Токму веродостојноста на изворите и точноста на информациите се меѓу најголемите предизвици за новинарството во ерата на ВИ, оценува долгогодишниот новинар и уредник и експерт во невладиниот сектор, Ибрахим Мехмети.
Во интервју за СКУП, Мехмети вели дека вештачката интелигенција, во најдобар случај, треба да се користи како спореден и споредбен извор, а не како главен извор на информации. Според него, конечната одлука за тоа што ќе биде објавено мора да остане кај новинарот, при што професионалната и човечката етика треба да имаат предност.
Тој предупредува и дека натпреварот меѓу медиумите за што побрзо објавување информации речиси секогаш оди на штета на квалитетот, а уште повеќе на точноста. Иднината на новинарството, според Мехмети, затоа треба да се бара во зајакнување на веродостојноста и оригиналноста.
СКУП: Со оглед на вашето долгогодишно искуство како новинар и уредник, кои се главните предизвици во употребата на вештачката интелигенција во новинарството?
Ибрахим Мехмети: Според мене, најголем предизвик е веродостојноста на изворот на информациите, како и нивната точност. Честопати се случува информациите добиени од ВИ да бидат далеку од точни.
Со оглед на брзината со која доаѓаат и се дополнуваат, односно ажурираат информациите, нивната проверка е сè поголем проблем, а следствено на тоа расте и опасноста од погрешно информирање.
СКУП: Постојано се зборува за етичка употреба на алатките за вештачка интелигенција. Каде се границите на етичкото и професионалното во споредба со она што го нуди вештачката интелигенција?
Ибрахим Мехмети: Според мене, во најдобар случај ВИ треба да се користи како споредбен и спореден извор, но секако не како главен извор на информациите.
Новинарската и човечката етика секогаш треба да надвладеат пред да се објави што било.
СКУП: Колку може и треба да им се верува на информациите што ги добиваме преку интернет, а се генерирани од вештачката интелигенција?
Ибрахим Мехмети: Поаѓајќи од тоа што може да се види, информациите кои потекнуваат од ВИ многу често се, во најмала рака, збунувачки и затоа, барем во овој степен на развој, овие информации треба да се прифатат со должно внимание.
СКУП: Дали брзината на информациите понекогаш треба да биде на штета на квалитетот?
Ибрахим Мехмети: Брзината со која честопати медиумите се натпреваруваат меѓу себе речиси секогаш оди на штета на квалитетот, а уште повеќе на точноста на информациите.
СКУП: Каде ја гледате иднината на македонското новинарство во ерата на вештачката интелигенција?
Ибрахим Мехмети: Новинарството воопшто, како и новинарството во Северна Македонија, мора да се зајакне во насока на веродостојноста и оригиналноста.
Овој текст е подготвен во рамките на проектот „Зајакнување на етичката употреба на генеративни алатки за вештачка интелигенција и медиумското покривање на вештачката интелигенција преку образованието по новинарство во Северна Македонија“, финансиран од Меѓународната програма за развој на комуникациите (IPDC) на УНЕСКО. Изразените ставови и мислења се исклучиво на авторот/авторите и не мора да ги одразуваат ставовите на УНЕСКО како донатор. При изработка на овој текст се користени помошни ВИ-системи.