Одлуката на Врховниот суд да ја укине правосилната пресуда за автобуската несреќа кај Ласкарци и предметот да го врати на повторно одлучување предизвика нова политичка конфронтација меѓу власта и опозицијата, во која двете страни меѓусебно се обвинуваат за влијание врз правосудството.
Премиерот Христијан Мицкоски ја нарече одлуката „големо разочарување“ и оцени дека во правосудниот систем сè уште има судии и обвинители кои се поврзани со центри на моќ од претходната власт.
„Вие бркате, затворате, тие ги пуштаат на слобода“, рече Мицкоски, коментирајќи ги одлуките на Врховниот суд во предметите „Ласкарци“ и „Јакимовски“.
Тој ситуацијата ја спореди со „донкихотовска битка“, оценувајќи дека институциите гонат и затвораат, а судовите потоа ги ослободуваат обвинетите или осудените.
„Џабе затвораме, кога има судии кои ги слушаат наредбите од газдата“, рече Мицкоски.
Премиерот не понуди докази во својата изјава за тврдењето дека конкретни судии постапуваат по наредби од политички или други центри на моќ.
СДСМ: Како еден премиер може да „брка и затвора“?
Изјавата веднаш предизвика реакција од СДСМ, кој токму употребата на прво лице множина – „ние бркаме и затвораме“ – ја стави во центарот на својата критика.
„Како еден премиер да брка и да затвора? Како еден премиер да гони?“, праша СДСМ во партиско соопштение.
Опозициската партија оцени дека премиерот не е обвинител, судија или полициски инспектор и дека неговата изјава, според нив, отвора прашање за односот на извршната власт со органите на прогонот.
„Мицкоски призна дека тој гони и апси“, тврди СДСМ.
Партијата оди чекор понатаму и тврди дека обвинителството постапува по налог на премиерот и дека полицијата, обвинителството, судовите и Агенцијата за национална безбедност се под политичка контрола.
„Кога сакаат – гонат. Кога сакаат – се оградуваат. Кога сакаат – пуштаат, затвораат“, наведува СДСМ.
Овие се тврдења на опозициската партија за кои во соопштението не се понудени докази.
СДСМ побара независност на обвинителството и судството, наведувајќи дека законот треба еднакво да важи за сите и дека одлуките на правосудните институции не смеат да зависат од политички наредби.
Врховниот суд ја укина пресудата за „Ласкарци“
Политичкиот судир следува откако Врховниот суд ги уважи барањата за вонредно преиспитување на правосилната пресуда поднесени од осудените преку нивните бранители.
Судот ја укина пресудата на Апелациониот суд Скопје од 17 април 2025 година и предметот го врати на повторно постапување и одлучување.
По одлуката, осудените излегуваат од затвор и во натамошната постапка ќе се бранат од слобода.
Укинувањето на пресудата не значи дека обвинетите се прогласени за невини. Предметот се враќа на повторно судско одлучување.
Несреќата се случи на 13 февруари 2019 година, кога автобус на гостиварскиот превозник „Дурмо турс“, кој сообраќаше од Скопје кон Гостивар, излета од автопатот кај Ласкарци. Загинаа 16 лица, а околу 30 беа повредени.
„Ласкарци“ и „Кочани“ во политичката битка за судството
СДСМ паралелно ја обвинува власта и за случувањата во судските постапки поврзани со трагедијата во дискотеката „Пулс“ во Кочани, тврдејќи дека дел од обвинетите се пуштаат да се бранат од слобода.
Од друга страна, Мицкоски токму одлуките на судовите ги користи како аргумент за своето тврдење дека дел од правосудниот систем останал под влијание на структури од претходната власт.
Така, власта и опозицијата доаѓаат до целосно спротивни заклучоци од истите случувања: Мицкоски тврди дека извршната власт се соочува со судии кои останале лојални на претходните политички структури, додека СДСМ тврди дека актуелната власт ги контролира институциите задолжени за истраги и кривичен прогон.