Во Бугарија се изработува саркофаг во кој треба да бидат положени посмртните останки што бугарските власти ги идентификуваат како останки на цар Самуил, а за неговата изработка се користи бел мермер од прилепскиот регион во Северна Македонија, објави Бугарската национална телевизија.
Саркофагот се изработува во каменорезачка компанија во Велинград, каде, според БНТ, работата трае непрекинато неколку дена.
Телевизијата наведува дека станува збор за прв царски саркофаг од ваков тип во поновата бугарска историја.
На капакот се врежани крст, натпис и симболи што бугарските историчари и археолози ги поврзуваат со Самуил и со неговото време.
„Цар на Бугарите“
На саркофагот е врежан натписот:
„Самуил, во Христа Бога, цар на Бугарите.“
Според БНТ, крстот што е употребен во дизајнот е преземен од камен поврзан со гробот на таткото на Самуил.
Под натписот се наоѓаат две стилизирани птици, мотив што, според бугарските археолози, се појавува и на ткаенина за која се смета дека била поврзана со погребувањето на Самуил.
Археологот Људмил Вагалински за БНТ изјави дека станува збор за исклучително скап текстил од почетокот на 11 век, изработен со свила и златни нишки.
Според него, двете птици можно е да претставуваат династички или хералдички симбол.
Охридската тврдина и „Свети Ахил“ на саркофагот
Страничните делови на саркофагот носат дополнителни симболи.
Меѓу нив се христограм, лик на Архангел Михаил, претстава на црквата „Свети Ахил“, како и стилизиран приказ на Самуиловата тврдина во Охрид.
БНТ наведува дека околу приказот на тврдината се поставени два лава, инспирирани од средновековни плочи кои бугарските историчари ги поврзуваат со Првото Бугарско Царство и со времето на Самуил.
Црквата „Свети Ахил“ е претставена меѓу пауни, кои во христијанската симболика се поврзуваат со вечноста.
Мермерот доаѓа од Македонија
Посебен интерес предизвикува фактот што самиот саркофаг се изработува од бел мермер што, според БНТ, е ископан во околината на Прилеп.
Управителката на компанијата што го изработува саркофагот, Надежда Кључкова, изјави дека каменот бил избран поради неговите природни жили и структура.
„Не сум правела саркофаг за цар. Можеби ова е првиот за Бугарија“, рече Кључкова.
Историјата повторно влегува во политичкиот простор
Подготовката на саркофагот доаѓа во период на повторно засилени расправи меѓу Скопје и Софија околу историското наследство на Самуил.
Бугарските институции и медиуми го претставуваат Самуил како бугарски цар, додека неговото наследство има силно место и во македонската историска и национална традиција.
Самиот саркофаг, според она што го прикажа БНТ, е дизајниран со јасно изразена бугарска историска интерпретација – од натписот „цар на Бугарите“ до симболите што се поврзуваат со средновековната бугарска држава.
Фактот што за неговата изработка е употребен мермер од Прилеп дополнително ѝ дава симболична тежина на приказната во Македонија.