Шестмина полициски службеници ќе бидат суспендирани и против нив ќе биде поведена дисциплинска постапка по случајот од 7 октомври во Скопје, откако Внатрешната контрола на МВР утврдила неправилности во нивното постапување, соопшти заменик-министерот за внатрешни работи Астрит Исени.
Случајот се однесува на наводи за прекумерна употреба на физичка сила врз двајца млади, за кои во јавноста беа објавени и видео-снимки.
Исени рече дека по прегледувањето на снимките, изјавите на сведоците и контролите што ги спровела Внатрешната контрола биле констатирани повеќе неправилности во постапувањето на полицајците.
„Шестмината полицајци ќе бидат суспендирани, а против нив ќе започне дисциплинска постапка“, соопшти Исени.
Млади тврдат дека биле тепани со врзани раце, Тошковски нареди истрага на полицајците
Се собираат докази и за евентуална кривична одговорност
Според заменик-министерот, постапката нема да заврши само со суспензијата.
Надлежните органи постапуваат по наредби на обвинителствата за вештачење и целосно документирање на доказите, врз основа на кои треба да се утврди дали постои и кривична одговорност.
„Ниту униформата, ниту функцијата, ниту припадноста не ослободуваат никого од примената на законот“, рече Исени.
Тој оцени дека полициската униформа подразбира одговорност за заштита на граѓаните и дека секоја злоупотреба го нарушува достоинството на граѓаните и довербата во полицијата.
Случајот предизвика политички реакции
Инцидентот предизвика реакции и од политичките партии, особено откако во јавноста се појавија снимки и тврдења дека двајцата млади биле физички нападнати од полициски службеници.
ДУИ претходно побара политичка одговорност од Исени, додека ВЛЕН инсистираше на целосно расчистување на случајот и санкции за сите инволвирани.
Пратеничката Фериде Хаџиу од ВЛЕН оцени дека суспензијата на шестемина полицајци е чекор кон утврдување одговорност.
Истрагата продолжува, а конечната одлука за евентуална кривична одговорност ќе зависи од доказите и постапувањето на обвинителството.