Десничарските екстремисти во Велика Британија сè почесто размислуваат за терористички напади врз мигранти, муслимани, центри за имиграција и хотели во кои се сместени баратели на азил, изјави директорот на британската служба за внатрешна безбедност МИ5, Кен Мекалум.
Мекалум рече дека преминот од радикализирани десничарски ставови кон насилство е „најизразениот тренд“ во случаите со кои МИ5 се занимавала во изминатата година.
Според него, службата регистрира пораст на случаи во кои екстремните антиимигрантски и антимуслимански ставови преминуваат во терористички намери, вклучувајќи планирање напади врз мигранти и муслимани.
Предупредувањето доаѓа во период на агресивни антимигрантски протести во Велика Британија и рекордно високо ниво на кривични дела мотивирани од расна и верска омраза, според „Гардијан“.
МИ5 истражувала и 13-годишно дете
Посебна загриженост за британската служба претставува радикализацијата на младите.
Мекалум рече дека младите се особено подложни на екстремно десничарски тероризам и откри дека во еден момент оваа година МИ5 истражувала радикализирано 13-годишно дете.
Тој потсети и на случајот со 16-годишник од Инверклајд, кој минатата година беше осуден на 10 години затвор откако признал дека планирал масовно убиство преку напад со запаливи средства врз муслимански центар во Гринок.
Иран ги проширува операциите во Британија
Шефот на МИ5 предупреди и на засилени активности на Иран.
Според него, Техеран покажува амбиции да напаѓа потешки цели, вклучувајќи и воени објекти како воздухопловната база RAF Fairford во Глостершир.
Контраразузнавачките операции поврзани со Иран довеле до повеќе од 50 апсења во Велика Британија во изминатата година, рече Мекалум.
Тој наведе дека дел од заканите биле насочени кон британските еврејски заедници и вклучувале наводни терористички заговори и планови за подметнување пожари во синагоги, деловни објекти и амбулантни возила.
Русија останува „агресор број еден“
Мекалум ја опиша Русија како „агресор број еден“ меѓу државните закани со кои се соочува Велика Британија.
Според него, Кремљ продолжува со активности против западните земји кои вклучуваат заговори за атентати, закани со експлозиви и сајбер-напади.
Некои од тие активности, рече тој, се приближуваат до границата на конвенционално војување.
Мекалум се осврна и на референдумот за Брегзит во 2016 година, велејќи дека Москва се обидувала да влијае преку анти-ЕУ содржини на RT и Sputnik и преку профили на социјалните мрежи поврзани со т.н. фабрики за тролови.
Но, тој направи јасна разлика меѓу обидот за влијание и неговиот ефект, нагласувајќи дека едно е „што можеби било обидено, а друго што навистина произлегло од тоа“.
МИ5 отвора центар за заканите од вештачката интелигенција
Британската служба посебно ќе го следи и ризикот од злоупотреба на вештачката интелигенција.
Мекалум рече дека е особено фокусиран на можноста непријателски држави или терористички организации да користат ВИ за развој на нови и смртоносни биолошки оружја.
МИ5 затоа формира нов центар за процена на заканите од вештачката интелигенција, чија задача ќе биде да ги разграничи реалните ризици од претераните или неосновани тврдења.
Мекалум предупреди дека заканите од непријателски држави се зголемиле четирикратно во последната деценија.
Тие сега заземаат приближно исто место во работата на МИ5 како традиционалната борба против тероризмот.
Тој предупреди и на растечкиот тренд на насилство насочено кон политичари, верски и други општествени групи.
„Повторно влеговме во нова ера на националната безбедност“, рече Мекалум.