Без консултации на јавноста за голем број предложени закони, неажурирани алатки за транспарентност и необезбедување навремени информации за новинарите и граѓаните, покажуваат неколку анализи на невладини организации. Забелешките на ЗНМ, МЦМС и на Агенцијата за заштита на правото на слободен пристап за падот на транспарентноста на институциите доаѓа во време кога од САД и ЕУ доаѓаат сериозни критики за корупција.
Алатката „Отворена влада – отворени податоци“ каде можеше да се видат трошоците кои ги направиле владините функционери, последен пат е ажурирана во ноември 2020 година кога премиер беше Зоран Заев.
Исто така, не е ажурирана и алатката за платите на претседателот на Владата и министрите. Таму сега се покажани приходите на министрите во првата Влада на премиерот Ковачевски. Во меѓувреме, платите на функционерите пораснаа за 78 проценти.
Владата на СДСМ со доаѓањето на власт во 2017 година, воведе многу алатки со кои сакаше да ја подобри транспарентноста на институциите, но многу од нив сега не се ефикасни.
Истражувањето на Македонскиот центар за меѓународна соработка (МЦМС) и Граѓанскиот ресурсен центар (ГРЦ) покажува и дека речиси за две третини од предлог-законите не бил направен консултативен процес на Електронски национален регистер (ЕНЕР).
Според извештајот, вкупно 86 од предложени 191 закон (45%) се на предлог на пратениците, а Собранието не спроведувало консултативен процес за предлог-закони кои се на предлог на пратеници и овластени предлагачи на закони.