Обединетото Кралство ќе биде домаќин на лидерите од Западен Балкан и европските претставници на Самитот на Берлинскиот процес во есента 2025 година, во обид да ја зајакне регионалната стабилност и да ја спречи нерегуларната миграција по клучните транзитни рути, соопшти британската влада во средата.
Самитот ќе се фокусира на зајакнување на безбедноста, економската соработка и справување со растечкиот предизвик на користење на Балканот како миграциски коридор кон Европа. Обединетото Кралство ги интензивира напорите за разбивање на мрежите за трговија со луѓе и зајакнување на граничната контрола, како дел од „Планот за промени“ на премиерот Кир Стармер.
Дејм Карен Пирс, една од најискусните британски дипломати, е назначена за специјален пратеник на Обединетото Кралство за Западен Балкан. Таа ќе ги предводи подготовките за самитот и ќе ги унапредува стратешките цели на Британија во регионот. Карен Пирс, поранешен британски амбасадор во САД и Обединетите нации, ќе ја преземе новата функција на пролет, заменувајќи го Ер Чиф Маршал Лорд Пич.
Обединетото Кралство веќе потпиша договори со Северна Македонија и Албанија за зајакнување на соработката во борбата против организираниот криминал поврзан со нерегуларната миграција. Преку Командата за гранична безбедност, Британија ги проширува партнерствата низ Европа за да се справи со миграцијата во нејзината почетна фаза.
Британскиот министер за надворешни работи, Дејвид Лами, изјави дека Западен Балкан останува приоритет за Британија, опишувајќи го самитот како заложба за европската безбедност и соработка.
„Западен Балкан има долгорочно значење за Обединетото Кралство, а нашите партнерства во регионот се клучни во напорите за сузбивање на нерегуларната миграција и елиминирање на криминалните групи што профитираат од човечката несреќа“, изјави Лами.
Северна Македонија и Албанија се меѓу клучните земји на оваа миграциска рута и ја зголемија соработката со Британија за разбивање на криминалните мрежи и зајакнување на граничната контрола. Новите договори имаат за цел зголемување на оперативната соработка и размена на информации за да се спречи нерегуларната миграција кон британска територија.
Самитот претставува значаен чекор во напорите на Британија за рестартирање на односите со Европа по Брегзит. Тој следи по неодамнешниот состанок помеѓу премиерот Стармер и германскиот канцелар Олаф Шолц, како и посетата на министерот за надворешни работи во Тунис за поддршка на проекти кои ги адресираат причините за миграцијата.
Обединетото Кралство исто така развива нов режим на санкции насочени кон мрежите за трговија со луѓе, со цел уништување на нивните финансиски и оперативни структури.
Со растечки тензии на Западен Балкан, поттикнати од руското влијание и организираниот криминал, регионот останува критично безбедносно прашање за Британија и нејзините сојузници во НАТО.