Израелскиот премиер Бенјамин Нетанјаху ги обвини лидерите на Велика Британија, Франција и Канада дека „го охрабруваат Хамас“, откако тие повикаа на прекин на израелската офанзива во Газа и укинување на ограничувањата за хуманитарната помош.
Во објава на платформата X, Нетанјаху директно им се обрати на британскиот премиер Кир Стармер, францускиот претседател Емануел Макрон и канадскиот премиер Марк Карни, велејќи дека „кога масовни убиеци, силувачи, убивачи на бебиња и киднапери ви се заблагодаруваат – тогаш сте на погрешната страна на правдата“.
Тројцата лидери претходно оваа недела ги осудија, како што ги нарекоа, „грубиот однос“ и дејствијата на израелската влада во Газа, и предупредија дека ќе преземат „конкретни чекори“ ако Нетанјаху не ја смени насоката.
„Не можам да сфатам како оваа едноставна вистина им излегува од вид на лидерите на Франција, Британија, Канада и другите“, рече Нетанјаху, тврдејќи дека нивните позиции не ја поттикнуваат стабилноста туку му даваат храброст на Хамас да продолжи со војната.
Неговата изјава дојде откако во напад врз израелската амбасада во Вашингтон беа убиени двајца членови на дипломатскиот персонал – инцидент што ја зголеми загриженоста за безбедноста на израелските мисии ширум светот. Британскиот премиер Стармер го нарече нападот „антисемитски“ и изрази солидарност со еврејската заедница.
Британскиот министер за надворешни работи, Дејвид Лами, оваа недела ги прекина преговорите со Израел за нов договор за слободна трговија, откако израелски министри повикаа на „прочистување на Газа“ преку протерување на Палестинците. Велика Британија воведе и санкции кон одредени израелски населеници на Западниот Брег.
Министерот за вооружени сили на Британија, Лук Полард, во петокот ги бранеше позициите на својата влада, велејќи дека „најдобриот пат до мирот е итен прекин на огнот, ослободување на заложниците и испорака на голема количина хуманитарна помош – храна, вода и лекови – во Газа без одложување“.
Тој додаде дека Британија ја поддржува правото на Израел на самоодбрана, но само доколку се спроведува во рамките на меѓународното хуманитарно право.