Пратеничката на Алијансата за Албанците, Мимоза Муса, изјави дека останува лојална на мандатот добиен од над 107.000 гласачи на коалицијата ВЛЕН, нагласувајќи дека нејзиното политичко делување ќе остане во служба на граѓаните, а не на лични интереси, јавува Инбокс7.
„Овој мандат не е само бројка, туку глас на еден народ изморен од над 20 години власт на ДУИ и кој бара промена,“ напиша Муса на Фејсбук, ставајќи до знаење дека нема да го следи нејзиниот партиски лидер, Арбен Таравари, кој ја напушти коалицијата ВЛЕН и Владата.
Во услови на, како што го оцени, „разнишан политички амбиент“, Муса порача дека останува доследна на коалицијата ВЛЕН, каде реши да остане фракција на АА предводена од вицепремиерот Арбен Фетаи и екс министерот Азир Алиу..
„Довербата што ми ја дадовте нема да ја изневерaм. Не сум тука за личен интерес, туку да им служам со достоинство и одговорност на сите што веруваат во оваа мисија,“ напиша Муса, додавајќи: „Промената започна и ние ќе ја водиме напред.“