Најмалку четворица лица загинаа, а 27 се повредени во „масовен напад“ на Русија врз украинската престолнина, соопштија во неделата украинските власти.
Дронови погодија повеќе региони низ Украина, вклучително и Запорожје, каде што беа повредени најмалку 16 лица, меѓу нив и три деца.
Украинскиот министер за надворешни работи изјави дека Русија користела стотици дронови и ракети во последниот бран напади. Москва засега не коментираше.
Претседателот Володимир Зеленски предупреди во саботата дека Русија нема да застане со Украина и дека со прекугранични упади го тестира европскиот систем на воздушна одбрана. „Путин нема да чека да ја заврши војната во Украина. Тој ќе отвори некоја друга насока. Никој не знае каде. Тоа го сака,“ рече Зеленски.
Во Полска, во неделата наутро беа кренати борбени авиони откако руските сили нападнаа западни делови на Украина, соопштија полските вооружени сили.
Истовремено, Данска пријави дронови над нејзините аеродроми, оценувајќи дека станува збор за „професионален актер“, без да посочи кој. Естонија пак обвини за руски упад во својот воздушен простор.
НАТО одговори со зајакнување на источниот фронт. Американскиот претседател Доналд Трамп изјави дека земјите членки треба да соборуваат руски авиони доколку навлезат во нивниот воздушен простор и за првпат порача дека Украина може да ја врати целата своја територија.
Рускиот министер за надворешни работи, Сергеј Лавров, во обраќањето на Генералното собрание на ОН во саботата изјави дека Москва нема намера да напаѓа земји членки на ЕУ или НАТО, но предупреди на „решителен одговор“ доколку се почувствува агресија кон Русија.