Универзитетското студентско собрание при Универзитетот „Св. Кирил и Методиј“ – Скопје (УСС-УКИМ) остро реагираше на информациите дека студентки биле снимани и фотографирани додека се туширале во бањите на студентскиот дом „Гоце Делчев“.
Во соопштението, студентите оценија дека станува збор за „акт на сексуално насилство и повреда на основните човекови права“, а не за „несреќен случај“ или „непромисленост“.
„Оваа ситуација уште еднаш покажа колку е небезбеден просторот што треба да биде дом за младите луѓе – идната интелектуална и академска сила на државата. Станува збор за систем што не ја препознава безбедноста на жените како приоритет и за култура што премолчува пред понижувањето и траумата што тие ја доживуваат“, се наведува во реакцијата.
УСС-УКИМ бара итна и темелна истрага, одговорност од сите инволвирани институции и воспоставување на безбедносни протоколи и механизми за пријава на вакви случаи. Студентите, исто така, побараа психолошка поддршка за жртвите и задолжителни обуки за родова чувствителност за управите на домовите.
„Нашите студентски домови мора да бидат места на сигурност, не на страв. Секој што мисли дека има право да ја наруши приватноста и да го сексуализира телото на некоја личност треба да знае – ќе одговара“, се додава во соопштението.
Студентите порачаа дека безбедноста на студентките не смее да се третира како административна формалност, додавајќи дека „срамот треба да смени страна“.