Поранешниот кандидат за градоначалник на Чаир и потпретседател на ДУИ, Бујар Османи, во објава на мрежата X, напиша дека „постои тишина што доаѓа по поразот“ – тишина, вели тој, „што ниту една победа не може да ја научи.“
Во долгата објава, Османи зборува за поразот на локалните избори во скопската општина Чаир, за искуството што го стекнал како хирург пред да влезе во политиката и за тоа како, според него, секој пораз е можност за рефлексија и обновување.
„Кога ја изгубив изборната трка во Чаир, тоа не беше мојот прв пораз,“ напиша Османи. „Јас сум хирург пред да бидам политичар, а таму одговорноста не се мери со фотелја, туку со човечки животи.“
Османи додава дека поразот во октомври го доживеал со мир, без шок или гнев, гледајќи го како „почеток на ново поглавје“.
„Победите не се твои, искуствата се,“ напиша тој. „Во политиката, секој успех изгледа личен додека не изгубиш и не сфатиш дека ниедна победа не е сопственост, туку заеднички плод.“
Во пораката, Османи наведува четири „лекции“ што, според него, ги научил од поразот.
Првата, дека победите се заеднички, а поразите лични.
Втората, дека тишината не значи пораз, туку размислување. „По изборите не дадов изјави, не барав оправдувања. Избрав тишина за да слушам подлабоко и да видам појасно,“ пишува тој.
Третата лекција е дека поразот е тест на мотивите. „Кога аплаузите стивнуваат, остануваат само вистинските вредности и односи.“
Четвртата, дека секој нов почеток е благослов.
Османи објаснува дека се вратил на медицината „не за да избега од политиката, туку за да го врати рамнотежниот мир“.
„Во операционата сала нема спин, нема публика – има работа, концентрација и одговорност. Таму ја најдов тишината што ми недостасуваше,“ напиша тој.
Во заклучок, Османи наведува дека поразот не е крај, туку „повторно калибрирање на насоката“.
„Поразот те учи на трпение, емпатија и нова амбиција – не за да се искачиш, туку за да градиш,“ додава тој. „Јас не се повлеков; се рекалибрирав.“
Објавата на Османи доаѓа по изборниот циклус во кој Демократската унија за интеграција (ДУИ) изгуби во повеќе општини, вклучително и во традиционално силните албански средини.