Владини партнери бараат итни законски измени, додека Министерството за здравство тврди дека секторот е строго контролиран
По големата полициска акција за заплена на десетици тони марихуана во Северна Македонија и Србија, дел од политичките партии побараа целосна забрана на производството на медицински канабис, иако станува збор за легално и високо регулирано стопанство со значаен извоз.
Коалицискиот партнер во Владата, Демократскиот сојуз, побара Собранието по скратена постапка да усвои законски измени со кои би се забранило производството на канабис за медицински цели, наведувајќи дека контролата затаила и дека секторот бил злоупотребен од организиран криминал.
Министерството за здравство ги отфрла тврдењата дека системот е неконтролиран.
„Производството на медицински канабис е строго регулирано, со редовни квартални извештаи, инспекциски надзори и ад-хок контроли“, изјави министерот за здравство Азир Алиу.
Во Северна Македонија од 2017 година се издадени 61 лиценца за производство на медицински канабис, од кои 14 се одземени поради неисполнување на законските услови. Во моментов активни се 43 компании.
Секторот, според официјални податоци, остварува годишен извоз од околу 30 милиони евра, главно на пазарите во Германија и Велика Британија. Извозот е предмет на строги меѓународни процедури и надзор од Канцеларијата на ОН за дроги и криминал во Виена.
Експерти предупредуваат дека евентуална забрана би го погодила легалниот бизнис, без нужно да го спречи нелегалниот пазар.
Глобалниот пазар на медицински канабис се проценува на околу 30 милијарди долари годишно, со проекции дека до 2032 година може да порасне на повеќе од 140 милијарди долари.