Повеќето британски весници во вторникот на насловните страници ги истакнуваат изјавите на американскиот претседател Доналд Трамп дека конфликтот со Иран се приближува кон крај, додека британските власти предупредуваат дека кризата на Блискиот Исток може да ја зголеми инфлацијата и цените на енергијата.
„Војната е при крај“ гласи насловот на таблоидот „Сан“, додека „Дејли мејл“ пишува „Војната со Иран е ‘речиси завршена’“, користејќи директен цитат од Трамп. „Дејли телеграф“ се фокусира на оценката на американскиот претседател дека војната е „многу завршена“, додека „Тајмс“ го опишува како пркосен и го истакнува неговото тврдење дека американската операција во регионот го оставила Иран „без морнарица, без комуникации и без воздухопловство“.
Во меѓувреме, „Гардијан“ и „Дејли мирор“ ја ставаат во фокус изјавата на британската министерка за финансии Рејчел Ривс, која предупреди дека конфликтот со Иран може да влијае врз инфлацијата во Велика Британија во наредните месеци. „Кризата на Блискиот Исток стигнува и дома“ е насловот на „Мирор“, додека „Гардијан“ пишува дека Ривс и премиерот Кир Стармер сугерирале дека владата „би можела да биде подготвена да интервенира“ за да ги заштити домаќинствата од нови шокови во трошоците за живот.
Во меѓувреме, британските автомобилски организации ги повикаа возачите да бидат повнимателни со потрошувачката на гориво, бидејќи конфликтот на Блискиот Исток предизвика нагло зголемување на цените на нафтата.
Автомобилската асоцијација „АА“ соопшти дека возачите треба да размислат за намалување на „неесенцијалните патувања“ и за поекономичен стил на возење за да ја ограничат потрошувачката на гориво. Организацијата „РАЦ“, пак, ги повика возачите да избегнуваат нагло забрзување и нагло сопирање за да ја намалат потрошувачката.
Цените на нафтата во понеделникот се искачија над 100 долари за барел, првпат од почетокот на војната во Украина, што предизвика загриженост од нов глобален енергетски шок.
Според „РАЦ“, цените на бензинот во Британија се зголемиле за речиси 5 пени по литар на 137,5 пени откако започнаа американско-израелските напади врз Иран. Во истиот период, просечната цена на дизелот пораснала за речиси 9 пени на околу 151 пени за литар.
Директорот за политика во „РАЦ“, Сајмон Вилијамс, изјави дека цената на безоловниот бензин „речиси сигурно“ ќе достигне просек од 140 пени за литар во наредната недела, додека дизелот веројатно ќе се искачи на најмалку 160 пени за литар.
Растот на цената на суровата нафта „Брент“ предизвика загриженост за потенцијален глобален енергетски шок. Британската министерка за финансии Рејчел Ривс треба да учествува на разговор со министрите за финансии на групата „Г7“, каде што се очекува да се дискутира за можноста за користење на стратешките резерви на нафта со цел да се намали притисокот врз пазарите.
Во меѓувреме, опозициската Конзервативна партија се обидува да иницира гласање во парламентот за плановите на владата подоцна годинава да ја зголеми акцизата на горивата.
Претседателот на „АА“, Едмунд Кинг, изјави дека возачите треба да очекуваат „постепено зголемување“ на цените на бензинските пумпи и ги повика граѓаните да не создаваат панични редици на бензинските станици.
„Нашата препорака е возачите да не ги менуваат навиките за точење гориво, но можат да размислат за намалување на неесенцијалните патувања и за поекономичен стил на возење“, рече Кинг.
Портпаролот на британскиот премиер изјави дека советите на „РАЦ“ и „АА“ се насочени кон заштеда на трошоци за потрошувачите, а не кон предупредување за недостиг на гориво, додавајќи дека владата внимателно ја следи ситуацијата со цените поради случувањата на Блискиот Исток.
Некои бензински станици пријавија привремен недостиг на гориво откако возачите побрзаа да ги наполнат резервоарите. Управниот директор на „Гил Марш Форкорс“, „Том Дант“, изјави дека најпрометната бензинска станица на компанијата во „Улсеби Крос“ во „Линколншир“ останала без гориво во понеделникот претпладне поради невообичаено висока побарувачка.
Поради зголемената побарувачка, компанијата го зголемила бројот на испораки од пет на седум неделно, што претставува дополнителни 72.000 литри гориво, но тоа сепак не било доволно за да се задоволи побарувачката.
Аналитичари предупредуваат дека пазарите стануваат сè позагрижени за можен прекин во глобалното снабдување со енергија, особено поради намалениот сообраќај низ „Ормутскиот теснец“, преку кој минува околу една петтина од светскиот извоз на нафта и гас.
Инвеститорите во меѓувреме очекуваат дека „Банката на Англија“ би можела да ги зголеми каматните стапки до крајот на годината поради нов притисок врз инфлацијата, при што пазарите проценуваат околу 75% веројатност каматната стапка да се зголеми од 3,75% на 4%. Ова би можело да доведе и до поскапи хипотекарни кредити за домаќинствата, велат пазарните аналитичари.