Експлозив со голема разорна моќ е пронајден во близина на гасната инфраструктура што ги поврзува Србија и Унгарија, соопшти српскиот претседател Александар Вучиќ.
Според него, експлозивот бил откриен во општина Кањижа, на северот на Војводина, во близина на гасоводот преку кој се транспортира руски природен гас кон Унгарија и други европски земји.
Вучиќ изјави дека српската полиција и армијата од утринските часови го пребаруваат теренот поради сомнежи за загрозување на критичната енергетска инфраструктура.
Унгарскиот премиер Виктор Орбан потврди дека бил информиран за настанот и свикал итен состанок на Советот за одбрана.
„Разговарав со Вучиќ за ситуацијата“, соопшти Орбан, додавајќи дека случајот се третира со највисок степен на сериозност.
Не е соопштено дали станува збор за обид за саботажа, ниту дали има осомничени лица, а истрагата е во тек.
Гасоводот е дел од клучната енергетска рута преку која се снабдуваат повеќе европски земји со природен гас.