Хрватскиот министер за одбрана Иван Анушиќ му возврати на српскиот претседател Александар Вучиќ, откако Белград повторно изнесе тврдења дека соработката меѓу Хрватска, Албанија и Косово претставува безбедносна закана за Србија.
Анушиќ изјави дека таквите тврдења се неосновани и нагласи дека станува збор за соработка насочена кон зајакнување на стабилноста и безбедноста во регионот, а не против некоја трета страна.
Неговата реакција доаѓа откако Вучиќ најави дополнително вооружување на Србија, повикувајќи се на, како што рече, „притисок од соседството“.
Хрватскиот министер потврди дека имал средба со албанскиот министер за одбрана Ермал Нука во Загреб, при што двајцата разговарале за продлабочување на соработката и развој на одбранбените капацитети.
„Нашата цел е мир, безбедност и стабилност во Југоисточна Европа. Врз тие принципи ја градиме нашата соработка“, изјави Анушиќ.
Тој додаде дека времињата кога некој ѝ диктирал на Хрватска како да ја води својата политика се завршени.
„Помина времето кога некој можеше да ѝ кажува на Хрватска што да прави. Денес сме суверена држава и членка на НАТО и Европската унија – и тоа никогаш повеќе нема да се промени“, рече Анушиќ.
Албанија, Хрватска и Косово минатата година потпишаа заедничка декларација за соработка во областа на одбраната и безбедноста. Трите земји постојано нагласуваат дека таа иницијатива не е насочена против ниедна држава.
Сепак, Белград во повеќе наврати ја претставува како потенцијална закана, без да изнесе конкретни докази.
Експерти оценуваат дека ваквата реторика може да служи како оправдување за зголемени воени трошоци и мобилизација на домашната јавност.
Професорот Едвард Џозеф од Универзитетот Џонс Хопкинс изјави дека „постојаните и претерани аларми“ за наводни закани од регионот се загрижувачки и може да создадат вештачко чувство на несигурност.
Тој предупреди дека континуираното вооружување на Србија, вклучително и набавката на напредни ракетни системи, отвора прашања за вистинските цели на таа политика.