Европската унија воведе санкции против две организации, „Еуромор“ и „Фондацијата за поддршка и заштита на правата на сонародниците во странство Правфонд“, обвинувајќи ги за ширење пропаганда и дезинформации насочени кон европската јавност.
Советот на ЕУ соопшти дека „Еуромор“ функционира како дел од проруската информативна мрежа, засилувајќи и рециклирајќи наративи кои ја доведуваат во прашање легитимноста на институциите на ЕУ и ја оправдуваат руската воена акција во Украина.
Во исто време, „Фондацијата за поддршка и заштита на правата на сонародниците во странство“ е опишана како инструмент на руското влијание во странство, кој преку правни и аналитички активности шири клучни пораки на Кремљ, вклучително тврдења за „нацификација“ на Украина, „русофобија“ и наводен прогон на рускоговорно население во соседните земји.
ЕУ оцени дека активностите на овие организации ја поддржуваат политиката на руската влада и ја поткопуваат демократијата, владеењето на правото и безбедноста во Унијата и Украина.
Со новите мерки, вкупниот број на санкционирани поради руските дестабилизирачки активности достигна 69 лица и 19 организации. На санкционираните им се замрзнува имотот, а на граѓаните и компаниите од ЕУ им се забранува да им обезбедуваат финансиски средства или економски ресурси.
ЕУ нагласи дека ќе продолжи да ги користи сите расположливи инструменти за спротивставување на хибридните закани и заштита на својата безбедност и институции.