Албанскиот премиер Еди Рама влезе во јавна полемика со новинарот на „Еурактив“, Eddy Wax, по интервјуто на министерот за надворешни работи Ферит Хоџа за договорот меѓу Албанија и Италија за прифаќање мигранти.
Спорот започна откако Хоџа во интервју изјави дека договорот со Италија е склучен на пет години и дека не е сигурен оти ќе има продолжување, бидејќи Албанија очекува до 2030 година да стане членка на Европската Унија.
„По пет години, кога Албанија ќе се зачлени, тоа повеќе нема да биде екстратериторијално. Ќе биде територија на Европската Унија. Договорот е за пет години и не сум сигурен дека ќе има продолжување“, изјави Хоџа, според објавениот транскрипт.
Изјавата предизвика реакции во Италија, каде што медиумите ја пренесоа како сигнал дека Албанија би можела да не го продолжи протоколот за мигранти по 2030 година.
Италијанскиот министер за надворешни работи Антонио Тајани изјави дека 2030 година е „далеку“ и дека сега фокусот треба да биде на спроведувањето на актуелните обврски.
Рама реагираше на социјалната мрежа X, тврдејќи дека цитатот бил „измамнички“ и употребен на начин што создава погрешен впечаток.
„Протоколот со Италија останува на сила сè додека Италија го сака тоа“, напиша Рама.
Италијанската премиерка Џорџа Мелони ја сподели неговата порака со краток коментар: „Grazie Edi“.
По објавувањето на целосниот транскрипт од „Еурактив“, Рама повторно реагираше, оценувајќи дека скратениот цитат бил „доволно измамнички“ за да биде искористен од оние со идеолошки интерес.
„Во крајна линија, останува непроменето: она што Италија го бара од Албанија, Италија го добива од Албанија“, напиша Рама.
Дел од албанските медиуми оценија дека ова не е првпат Хоџа, кој е помалку од 100 дена на функцијата, да предизвика дипломатски недоразбирања.
Како претходни случаи беа наведени неговите коментари поврзани со косовската министерка Доника Грвала и со албанските партии во Северна Македонија.
Договорот меѓу Албанија и Италија за мигрантите е едно од најважните прашања во билатералните односи меѓу Тирана и Рим, а Рама повеќепати нагласи дека Албанија ќе продолжи да ја поддржува Италија во спроведувањето на протоколот.