Поранешната министерка за внатрешни работи Гордана Јанкулоска изјави дека дел од судските предмети, вклучително и оние што ги водеше поранешното Специјално јавно обвинителство (СЈО), биле процесуирани по политички диктат, а не врз основа на закон и докази.
Коментирајќи го застарувањето на дел од предметот „Талир 1“, поврзан со наводно нелегално финансирање на ВМРО-ДПМНЕ, Јанкулоска оцени дека проблемот не е во законската рамка, туку во начинот на кој, како што рече, правниците ја применувале.
„Проблемот не е во законите, туку во правниците кои во сè гледаа политичка математика и градеа кариери преку сервилност, а не преку резултати и квалитет“, изјави Јанкулоска.
Таа обвини дека СЈО се занимавало со политика наместо со истрагите за масовното незаконско прислушување, поради што дел од предметите застареле.
Според Јанкулоска, обвинителството било користено како политички инструмент и водело, како што наведе, „политички прогон“, наместо да постапува како независна правна институција.
СЈО беше формирано во 2015 година како дел од договорот меѓу водечките политички партии, со мандат да ги истражи кривичните дела што произлегоа од објавените прислушувани разговори. Институцијата престана со работа во 2020 година, по низа контроверзии и судски пресуди против поранешни обвинители.
Судските процеси поврзани со предметите на СЈО и натаму предизвикуваат силни политички реакции и дебати околу владеењето на правото и одговорноста во правосудството.