Универзитетот на Југоисточна Европа во саботата ја организираше свечената церемонија на дипломирање на 22-та генерација студенти, традиционален настан на кој присуствуваа студенти, нивните семејства, претставници на институции, партнери и бројни гости.
Во свечена атмосфера продефилираа дипломците од седумте факултети на универзитетот, а за првпат дел од академската поворка беа и студентите од Факултетот за технички науки.
Претседателот на Одборот на Универзитетот, Клаус Тохтерман, ја поврза симболиката на 22-та генерација со мисијата на УЈИЕ.
„Бројот 22 се смета за еден од најмоќните броеви што може да ги претвори соништата во реалност. Тоа се совпаѓа со мисијата на УЈИЕ – ‘Оживеј го своето знаење’. Со знаењето стекнато на Универзитетот, студентите можат да ги реализираат своите соништа“, рече Тохтерман.
Ректорот на УЈИЕ, Садудин Ибраими, нагласи дека оваа генерација дипломира во особено значајна година за институцијата.
„Во ноември Универзитетот ќе одбележи 25 години постоење. Тоа е четврт век квалитетно образование, академска работа, институционален развој и посветеност кон студентите“, изјави Ибраими.
На свеченоста се обрати и министерката за образование и наука Весна Јаневска, која ги охрабри дипломците своето знаење и потенцијал да ги вложат во развојот на земјата.
„Ви посакувам истрајност и успех во надминувањето на идните предизвици. И Универзитетот и ние очекуваме ваш придонес во градењето на иднината на оваа држава“, рече Јаневска.
Во име на студентите говор одржа студентот на генерацијата од Факултетот за бизнис и економија, Илир Душку, кој им се заблагодари на семејството, професорите и колегите за поддршката во текот на студиите.
„Оваа диплома не е само моја. Таа е резултат на љубовта, жртвата и довербата што ми ги дадовте сите овие години“, рече Душку.
Церемонијата беше збогатена со музичка програма во изведба на Рилинд Алимани, професорот и пејач Агим Пошка, кој ја изведе универзитетската химна „Гласот на знаењето“, како и градскиот хор и трио класична музика.