Германскиот канцелар Фридрих Мерц во петокот ја бранеше одбранбената политика на Германија, откако американскиот претседател Доналд Трамп повторно ги критикуваше европските членки на НАТО за недоволното издвојување за одбраната, неколку дена пред самитот на Алијансата во Анкара.
Трамп, кој со години бара европските сојузници да преземат поголем дел од товарот за колективната безбедност, оваа недела на социјалната мрежа Truth Social оцени дека сегашната распределба на трошоците во НАТО е „апсурдна“ и „еднострана“. Во една од објавите тој посочи дека германските одбранбени расходи во периодот од 2014 до 2025 година биле значително пониски од американските.
Одговарајќи на критиките, Мерц изјави дека Германија ќе го удвои својот одбранбен буџет во следните четири години.
„Ова е најголемиот напор што некогаш сме го направиле за зајакнување на нашите одбранбени способности. Во таа смисла, немаме причина да се срамиме пред никого“, рече германскиот канцелар.
Тој додаде дека Германија, како најголема членка на Европската унија, има посебна одговорност во обезбедувањето на европската безбедност.
Односите меѓу Вашингтон и европските сојузници остануваат затегнати поради повеќе прашања, вклучувајќи ја американската политика кон Иран, барањата за зголемени воени трошоци и ставовите на Трамп за улогата на САД во НАТО.
Под притисок од Вашингтон, членките на НАТО се согласија до 2035 година да издвојуваат 3,5 проценти од бруто-домашниот производ за основните одбранбени потреби, што претставува значително зголемување во однос на претходната цел од два проценти.
Мерц изјави дека Германија планира да ја достигне новата цел уште во 2029 година, шест години пред договорениот рок.
„Ќе го достигнеме прагот од 3,5 проценти поставен во Хаг уште во 2029 година, значително пред утврдениот рок“, рече тој.
Изјавите доаѓаат во пресрет на самитот на НАТО во Анкара, каде што лидерите на 32-те земји членки ќе разговараат за идното финансирање на Алијансата, војната во Украина и односите меѓу Европа и Соединетите Американски Држави.