Соединетите Американски Држави ја одбележаа 250-годишнината од независноста со национални прослави, огномети, концерти и воени прелети, додека претседателот Доналд Трамп во говор пред граѓаните во Вашингтон порача дека „американскиот сон се врати“.
Главната церемонија на Националниот мол беше привремено прекината поради силно невреме, дожд и опасност од грмотевици, по што посетителите и медиумите беа евакуирани. Настанот подоцна продолжи, а говорот на Трамп беше одложен за доцна вечерта.
Во околу 40-минутното обраќање, Трамп зборуваше за американската историја, ветераните, воените херои и политичката агенда на неговата администрација, вклучително и изборните реформи, безбедноста и правото на носење оружје.
Тој им оддаде почит на ветерани од Втората светска војна, Корејската и Виетнамската војна, како и на носители на Медалот на честа.
„Ова е само зората на златното доба на Америка“, рече Трамп, завршувајќи го говорот со пораката „Бог да ја благослови Америка“.
Прославите низ земјата беа погодени од екстремни временски услови, со температури над 38 степени Целзиусови на делови од источниот брег, како и дожд и грмотевици што доведоа до одложување или преместување на дел од настаните.
Во Вашингтон, прославата заврши со голем огномет над Капитол и Националниот мол, додека слични огномети и свечености се одржаа и во Њујорк, Филаделфија и други американски градови.
Јубилејот ја одбележува 250-годишнината од потпишувањето на Декларацијата за независност во 1776 година, со која 13-те колонии ја прекинаа британската власт и го започнаа создавањето на Соединетите Американски Држави.