Директорот на Централната разузнавачка агенција на САД (ЦИА), Џон Ретклиф, изјави дека широката употреба на украински дронови со вештачка интелигенција значително ја намалила просечната должина на преживување на новите руски регрути на бојното поле.
Говорејќи на самит за одбрана и иновации во Пенсилванија, Ретклиф рече дека американските разузнавачки проценки се совпаѓаат со информациите од фронтот.
„Животниот век на руски регрут кој денес пристигнува на бојното поле во Украина се проценува на 20 до 30 минути“, изјави тој.
Според Ретклиф, високите загуби се должат на употребата на специјализирани и економични ударни дронови со вештачка интелигенција, кои ѝ овозможуваат на Украина делумно да ја неутрализира руската предност во човечки ресурси.
Американски претставници проценуваат дека Русија во моментов губи околу 7.000 војници неделно, додека украинскиот претседател Володимир Зеленски претходно изјави дека дроновите уништуваат повеќе од 80 проценти од означените цели.
Изјавите на директорот на ЦИА доаѓаат во време кога САД и нивните сојузници разгледуваат нови модели за финансирање на украинските програми за развој на дронови, со цел да добијат пристап до украинските технологии за таргетирање базирани на вештачка интелигенција.
Во меѓувреме, австралиската армија веќе тестира извидувачки дронови чиј софтвер е усовршен врз основа на искуствата од украинското бојно поле.
Американската компанија Enabled Intelligence, пак, објави база од околу 500.000 часа снимки од украински дронови, која ќе служи за обука на автономни воени системи во САД, Украина и земјите членки на НАТО.