Photo: Reuters
Шест лица загинаа, а четворица се повредени во украински ракетни напади врз руската област Белгород во текот на ноќта, соопшти вршителот на должноста гувернер Александар Шуваев, додека Русија продолжи со воздушните напади врз Украина.
Меѓу повредените во Белгород има и 14-годишно дете, кое било пренесено во болница, објави Шуваев на Телеграм.
Според него, во селото Колосково, во округот Валујски во близина на украинската граница, била погодена зграда и оштетено возило.
Украинските власти, од друга страна, соопштија дека две лица загинале во руски напади со беспилотни летала врз Сумската област, која се наоѓа во близина на границата со Русија.
Последните жртви доаѓаат по викенд со интензивни меѓусебни воздушни напади, во кои загинаа цивили од двете страни.
Москва тврди дека била цел на околу 600 дронови
Украина во последните недели ги засили нападите со беспилотни летала длабоко на руска територија.
Според руските власти, во саботата вечерта Украина испратила околу 822 дронови кон Русија, од кои околу 600 биле насочени кон Москва. Руските власти го опишаа нападот како еден од најмасовните врз главниот град во последниот период.
Најмалку пет лица загинале во Ростовската област. Жена загинала при напад врз цивилен автобус во Белгород, додека 83-годишен маж бил убиен во напад со дрон во Московската област.
Погоден бил и магацин на рускиот онлајн-трговец Wildberries.
Украинското Министерство за одбрана тврди дека со последните напади се оневозможени седум од десетте најголеми логистички центри на компанијата. Овие тврдења не можат независно да се потврдат.
Русија ја засилува кампањата врз Украина
Истовремено, Москва ги интензивира ракетните и воздушните напади врз украинските градови и енергетската инфраструктура.
Украинската енергетска компанија „Нафтогас“ соопшти дека нејзините објекти биле нападнати 13 пати во последната недела.
Во Запорожје маж и жена загинале откако приватна куќа била погодена со наведувана воздушна бомба, додека уште пет лица загинале во други напади низ Украина во текот на викендот.
Во Киев беше погоден и пазар за книги во областа Почајна.
Русија соопшти дека нејзините напади во Киев биле насочени кон објект за производство на делови за украинските ракети „Фламинго“ и фабрика за компоненти за беспилотни летала.
Зеленски: Повеќе од 1.500 дронови за една недела
Украинскиот претседател Володимир Зеленски изјави дека во изминатата недела биле нападнати 13 украински региони.
Според него, Русија употребила повеќе од 1.550 ударни дронови, речиси 1.560 наведувани воздушни бомби и 62 ракети.
Русија и Украина меѓусебно се обвинуваат за напади врз цивилни цели. Војната, која започна со руската инвазија во февруари 2022 година, е во петтата година, а Русија контролира приближно една петтина од украинската територија.
Последниот бран напади покажува дека воздушната војна сè повеќе се префрла и длабоко зад линиите на фронтот, при што Украина ги напаѓа руските логистички и индустриски капацитети, додека Москва продолжува да ги гаѓа украинската енергетска, воена и друга инфраструктура.