Советот на Општина Пехчево едногласно ја отфрли иницијативата за изградба на дата-центар на територијата на општината, по јавни реакции и предупредувања за можните енергетски и еколошки последици од проектот.
Сите девет советници – петмина од ВМРО-ДПМНЕ и коалицијата, тројца од СДСМ и коалицијата и еден од ЗНАМ – гласале против иницијативата.
Градоначалникот на Пехчево, Александар Китански, рече дека евентуална идна инвестиција од ваков тип треба да биде разгледувана врз основа на стручни анализи, а не на претпоставки.
„Ако некогаш дојде до таква инвестиција, треба да знаеме која е користа за општината, кои се придобивките, но и кои се штетните последици. Не можеме да шпекулираме без релевантни податоци и стручни анализи“, рече Китански.
Иницијативата претходно предизвика политички реакции. Левица тврдеше дека изградбата на дата-центар во Панчарево може да има значително влијание врз енергетскиот систем и ја обвини локалната власт дека се обидува проектот да го спроведе без доволна јавна дебата.
По гласањето, Левица соопшти дека притисокот врз локалната власт дал резултат и побара проектот да не биде повторно предложен во друга форма.
Против иницијативата реагираше и ДОМ, барајќи постапката да биде запрена додека не бидат познати потенцијалните последици.
Дата-центрите се инфраструктурни објекти во кои се сместуваат компјутерски сервери и системи за складирање и обработка на податоци. Големите центри можат да бараат значителни количества електрична енергија и вода за ладење, но истовремено можат да донесат инвестиции, даночни приходи и нова дигитална инфраструктура.
Засега не се наведени детални технички параметри за предложениот проект во Пехчево кои би овозможиле прецизна проценка на неговата потрошувачка на енергија и вода или економската корист за општината.