Елиса Спиропали, поранешна министерка и висока функционерка на владејачката Социјалистичка партија, јавно го критикуваше, како што наведе, моделот на владеење во Албанија, предупредувајќи дека институциите се претвораат во инструменти на притисок и контрола.
Во објава со изразен политички тон, таа посочи дека била советувана да молчи за да избегне напади, но оцени дека токму таквиот пристап придонел за создавање на сегашната состојба, во која институциите повеќе не функционираат како независни тела на одлучување.
Спиропали нагласи дека одлуките сè почесто се носат од ограничен круг луѓе, додека законот се толкува според моменталните потреби, а не врз основа на принципи.
Таа оцени дека ваквиот модел се развивал постепено, преку мали компромиси, молчење и интервенции кои на почетокот изгледале незначителни, но со текот на времето станале суштински за функционирањето на системот.
Според неа, дел од институциите повеќе не постапуваат според закон и процедура, туку според наредби и неформални структури, што создава перцепција дека граѓаните и бизнисите не се соочуваат со држава, туку со централизирана моќ.
Во албанската јавност, ваквите критики предизвикаа споредби со унгарскиот опозиционер Петер Маѓар, кој по дистанцирањето од владејачките структури во Унгарија стана симбол на внатрешен отпор кон концентрираната политичка моќ.
Аналитичарите оценуваат дека сличноста се состои во тоа што критиките доаѓаат од внатрешноста на системот, што им дава дополнителна тежина и потенцијал за политички импликации.
Спиропали истакна дека нејзиниот став не е личен судир, туку несогласување со модел кој, како што рече, станува норма.
„Поделбата не е меѓу луѓето, туку меѓу функционалните институции и злоупотребените структури“, наведе таа, додавајќи дека партијата има капацитет за реформи.
Набљудувачите предупредуваат дека ваквите јавни истапи од високи функционери може да сигнализираат продлабочување на внатрешните тензии во власта, во услови на зголемен притисок за реформи и поголема отчетност.