Опозициската СДСМ поднесе интерпелација за министерот за земјоделство Цветан Трипуновски, обвинувајќи го за корупција, неефикасност и штетни политики во ресорот.
Од партијата соопштија дека интерпелацијата се темели на, како што наведуваат, „сериозни и континуирани случаи на системска корупција, злоупотреба на службената положба и кршење на законите“, како и на нарушено функционирање на институциите во земјоделството.
Поранешниот министер за земјоделство Љупчо Николовски изјави дека во изминатите две години земјоделството е доведено до „колапс“, обвинувајќи дека се укинати или суспендирани мерки и програми за поддршка на земјоделците.
„Наместо развој и поддршка, земјоделците се соочуваат со кратења, притисоци и несигурност“, изјави Николовски.
Министерот Трипуновски возврати на социјалните мрежи, оценувајќи ја интерпелацијата како „нелегитимна“ и политички мотивирана.
„Интерпелацијата ќе биде исто толку неуспешна како и твојот мандат“, напиша Трипуновски, додавајќи дека рејтингот на СДСМ „паѓа толку ниско што го пробива секое дно“.