Поддршката за ВМРО-ДПМНЕ се намали за 4,7 процентни поени за шест месеци, но владејачката партија и натаму има повеќе од трипати повисок рејтинг од СДСМ, покажува споредбата на трите анкети на МКД.мк спроведени од „Маркет вижн“ во март, јуни и септември.
ВМРО-ДПМНЕ имала поддршка од 24 отсто во март, 20,5 отсто во јуни и 19,3 отсто во септември.
СДСМ, пак, од 4,9 отсто во март пораснала на 6,2 отсто во јуни, но во септември повторно паднала на 5,6 отсто.
Тоа покажува дека намалувањето на поддршката за владејачката партија засега не се прелева во значителен раст на најголемата опозициска партија.
Јазот меѓу нив сепак се намалува. Од 19,1 процентни поени во март, разликата паднала на 14,3 во јуни и на 13,7 процентни поени во септември.
ДУИ и ВЛЕН се изедначија
Промени има и во албанскиот политички блок.
Во март ВЛЕН била пред ДУИ со 5,1 наспроти 4,8 отсто. Во јуни односот се променил – ДУИ пораснала на 5 отсто, додека ВЛЕН паднала на 4,4 отсто.
Во септемвриското мерење двете политички опции се изедначени со по 4,2 отсто поддршка.
Во шестмесечната споредба, ДУИ бележи пад од 0,6 процентни поени, а ВЛЕН од 0,9 поени.
Левица расте, ЗНАМ паѓа
Меѓу помалите партии највидлив раст бележи Левица.
Нејзиниот рејтинг се движел од 3,1 отсто во март, преку 2,9 отсто во јуни, до 4 отсто во септември.
Со тоа Левица во последната анкета е само 0,2 процентни поени зад ДУИ и ВЛЕН.
Спротивен тренд има ЗНАМ, чија поддршка се преполовила – од 2,1 отсто во март на 1,5 отсто во јуни и 1 отсто во септември.
Пад и кај Мицкоски
Сличен тренд како кај ВМРО-ДПМНЕ се забележува и кај нејзиниот лидер Христијан Мицкоски.
Во март доверба во него имале 25,2 отсто од испитаниците, додека во септември тој процент изнесува 20,4 отсто – пад од 4,8 процентни поени.
Лидерот на СДСМ, Венко Филипче, останува во приближно ист опсег – од околу 3,6 отсто во март на 3,8 отсто во септември.
И покрај падот, Мицкоски има повеќекратно повисока лична поддршка од лидерот на најголемата опозициска партија.
Најголемиот блок е надвор од партиите
Но, можеби најсилниот политички сигнал од септемвриската анкета не е рејтингот на ниту една партија.
Околу 41 отсто од испитаниците велат дека нема да гласаат, не знаат за кого би гласале или не одговориле, додека 44,1 отсто немаат доверба во ниту еден од понудените партиски лидери.
Тоа укажува дека голем дел од избирачкото тело во моментот не се идентификува со ниту една од главните политички опции.
Трите анкети затоа покажуваат двоен тренд: ВМРО-ДПМНЕ ја губи дел од предноста што ја имаше во март, но СДСМ засега не успева да ја претвори таа ерозија во значително зголемување на сопствената поддршка.