Политички претставници и поранешни државници денеска го одбележаа 23 Октомври – Денот на македонската револуционерна борба, поврзувајќи го историското наследство на револуционерното движење со потребата од единство, реформи, институционална одговорност и подобар живот во современа Македонија.
Претседателката Гордана Сиљановска-Давкова оцени дека државата повторно е пред „историски испит“ и дека почитта кон револуционерите има смисла само ако нивните идеали денес се преточат во праведност, солидарност и посветеност на општото добро.
„Историското завештание не е само причина за гордост, туку и морална обврска да ја унапредуваме државата, да го штитиме човечкото достоинство и да создаваме општество во кое правото, правдата и моралот ќе бидат реалност“, порача Сиљановска-Давкова.
Претседателката оцени дека револуционерниот порив денес не се мери со жртвување, туку со чесно работење, интелектуална смелост и подготвеност за неопходни реформи.
Според неа, одговорноста кон минатите генерации подразбира почит кон нивната жртва, а кон идните – создавање сигурна и просперитетна држава.
Иванов: Секоја генерација има своја борба
Поранешниот претседател Ѓорге Иванов, пак, рече дека секоја генерација има сопствена борба и дека денешниот стремеж треба да биде создавање подобар и подостоинствен живот во земјата.
Тој оцени дека шестемина основачи на Македонската револуционерна организација во 1893 година создале политичка визија околу која се обединиле луѓе од различни социјални, верски и етнички средини.
„Само кога сме сплотени, истрајни и цврсти во одлуката, секогаш победуваме“, порача Иванов.
Ѓорѓиевски: Историскиот аманет треба да продолжи со дела
Градоначалникот на Скопје Орце Ѓорѓиевски во својата честитка го истакна историското значење на ВМРО, оценувајќи дека идеалот за слободна и самостојна македонска држава останува аманет за сегашните генерации.
Тој порача дека денешната обврска е тој историски идеал да се продолжи преку заштита на државата, македонскиот јазик и достоинството и преку создавање услови младите да ја гледаат својата иднина во земјата.
Милошоски: Македонија е идеал и завет
Потпретседателот на Собранието Антонио Милошоски порача дека Македонија е „идеал и завет“ и дека празникот треба да биде потсетник на обврската да се почитува минатото и одговорно да се гради иднината.
Тој им оддаде почит на основачите на револуционерната организација, нагласувајќи дека нивниот стремеж кон слобода и државност останува дел од македонското историско наследство.
Во повеќе честитки од партии и политичари денеска доминираа пораките за национално единство, историски континуитет и зачувување на државноста.
Истовремено, дел од пораките беа насочени и кон сегашните политички и економски предизвици – реформите, владеењето на правото, иселувањето и потребата младите да имаат перспектива во Македонија.
Со свечени академии, положување цвеќе и јавни обраќања низ земјата се одбележува 133-годишнината од основањето на Македонската револуционерна организација во Солун во 1893 година.