Македонскиот претседател Стево Пендаровски, изјави дека во најмалку три наврати НАТО пресретнал терористички напади кои се подготвувале против Македонија.
„Нема да навлегувам во детали, но според податоците добиени од НАТО, во изминативе години најмалку три пати биле пресретнати терористички напади, а се уште биле во подготвителна фаза што се случувала надвор од нашата територија,“ рече Пендаровски во својот годишен говор пред Собранието.
Пендаровски истакна дека НАТО активно и помага на Северна Македонија во однос на хибридните и терористичките закани, пред се поврзани со повратниците од војните на Блискиот Исток.
Пендаровски го потсети Собранието дека „во 2016 година, недалеку од Северна Македонија, во Црна Гора, имаше обид за државен удар преку традиционална, а не хибридна закана“.
„Сепак, требаше да се случи големата трагедија во Украина за да се увериме дека со Преспанскиот договор навреме се ситуиравме под колективниот штит на НАТО, без национално да се обезличиме, како што некои стравуваа“, истакна Пендаровски.
Северна Македонија е полноправна членка на НАТО од март 2020 година, откако претходно го потпиша Преспанскиот договор со кој беше тргнато грчкото вето.