Актерот Џереми Ренер се појави на црвениот тепих во театарот „Риџенси вилиџ“ во Лос Анџелес на премиерата на реалната серија Rennervations на „Дизни-плус“, прв настан на кој присуствува по тешката несреќа во јануари кога беше прегазен од плуг за чистење снег.
Ренер за оваа пригода облече темносино одело, со бела кошула. На премиерата одеше со помош на бастун, а користеше и електричен ромобил додека разговараше со медиумите.
И покрај огромната болка со која сè уште живее, Џереми (52) е насмеан додека им позира на желните фотографи. Му помогна што беше опкружен со своето гордо семејство.
За потсетување, актерот се обидувал да употреби плуг за чистење снег за да му помогне на својот внук да го извлече автомобилот од длабокиот снег во близина на куќата, но заборавил да ја притисне сопирачката кога излегол од возилото за да му помогне. Плугот потоа почнал да се тркала кон внукот на Ренер, а кога актерот потрчал во обид да се врати внатре и да воспостави контрола, тој бил повлечен под него и смачкан.