Судот во Тетово му одреди казна затвор од една година и три месеци на анестезиологот Валтон Дервиши, кој снимаше и на „ТикТок“ објави видеа со пациенти и од медицински персонал на одделението за Гинекологија во болницата во Тетово, јавува РСЕ. На почетокот на судењето тој ја призна вината, по што судот му ја одреди казната.
Дервиши беше обвинет за две кривични дела „несовесно работење во службата“ и „неовластено снимање“. Судот за првото дело му одреди казна затвор од една година, а за второто – пет месеци или единствена казна затвор од една година и три месеци. За изречената казна се смета и времето кое анестезиологот го помина во притвор, од 14 април до денес.
Како што наведе судот, Дервиши има право на жалба на пресудата во рок од осум дена. Судот одлучи да му ја укине мерката притвор и му определи мерка куќен притвор од 60 денови.
Тој снимките ги направи на 14 април годинава, по што беше пријавен во полиција и приведен истиот ден, кога судија во претходна постапка му одреди и притвор
Тој во моѓувреме беше отпуштен од работа, а Лекарската комора му ја одзеде лиценцата. На 24 април заседаваше Судот на честа при Лекарската комора и одлучи да Дервиши, кој е специјалист анестезиолог да остане без лиценца седум години, што е максимална казна што може да се изрече за етички прекршок во работењето.