Градоначалникот на општина Тетово, Билал Касами, вети дека за три месеци во Тетово ќе има прифатилиште за кучиња скитници.
„Со проектот што го работиме за изградба на прифатилиште за бездомни кучиња, оценувам дека ќе бидеме чекор поблиску до конечното решение на овој проблем“, најави Касами.
Тој наведе дека до сега во Општина Тетово се третирани 80 кучиња скитници врз основа на договорот со здружението „Амос“, и додаде дека во последно време се помалку кучиња скитници има во централниот дел на градот.
„Постапките ќе траат бидејќи не е вклучена само општина Тетово, туку и Државниот инспекторат и Државната агенција за ветеринарство. Со овие институции сме во постојана координација за условите и прописите кои одредуваат како може да биде засолниште. Така што во најкраток период ќе се обидеме да формираме прифатилиште и тоа ќе зависи од тоа кога ќе се добие дозвола од овие институции“, нагласи Касами.
Територијата на општина Тетово продолжува да биде една од најпогодените територии од феноменот на кучињата скитници. Касами се пожали дека во Тетово се носат кучиња од други градови. Поради оваа причина Касами побара поголема вклученост и на полицијата.