УЈП и Министерството за финансии во изминативе пет години откриле низа неправилности во десетина фирми за брзи кредити, при што 13 се казнети, но висината на казните не ја откриваат. Две третини од добивката во овој сектор го добиваат фирмите основани со странски капитал, покажува анализата на РСЕ.
Бизнисот со брзи кредити во првото тромесечје од годинава „тежел“ 154 милиони евра, што е за речиси 35 милиони евра повеќе од истиот период минатата година, покажуваат податоците од Народна Банка.
Пред само три години овој сектор „тежел“ двојно помалку, односно 77 милиони евра годишно. Со растот на приходите пораснал и бројот на фирми кои се занимаваат со небанкарско кредитирање на население. Од 30 финансиски друштва во 2020 година за три години се отворени плус пет нови, покажува регистарот на Министерството за финансии.
За разлика од банките, чија работа ја регулира Народна банка, друштвата се регулирани од Министерството за финансии, па кредити даваат многу полесно, а ризикот го наплаќаат со високи трошоци за кредитите.
Најголемиот дел од добивката од зделките со брзи пари во земјава завршува на салдото на компаниите кои се основани со странски капитал, покажува анализата на податоците од завршните сметки на овие компании.
Минатата година вкупната добивка на сите 35 фирми изнесувала речиси 16 милиони евра од кои колачот од 12 милиони евра го делат фирмите на сопственици од други земји.
Милионери од Русија, Летонија, Чешка, Естонија, а најмногу од Бугарија, на македонскиот пазар поседуваат фирми кои нудат небанкарски кредити, односно продавници за кеш. Од 12 фирми основани со странски капитал, дури седум се во сопственост на бугарски бизнисмени и милионери. И токму кај нив завршила половина од вкупната заработка од 16 милиони евра на сите финансиски друштва, односно 8 милиони евра.
Целата анализа прочитајте ја ТУКА