Претседателот на Движењето БЕСА, Билал Касами од собирот со младите одржан синоќа во Гостивар, упати сериозни обвинувања до првиот вицепремиер Артан Груби, пренесува Инбокс7.
Касами рече дека Груби се залагал да го врати во Македонија поранешениот премиер, Никола Груевски, кој од 2018 престојува во Унгарија.
„Да, тој Артан Груби кој до вчера беше заедно во владата со Никола Груевски, во последните неколку дена повторно се обидува да го врати на политичката сцена. Сте слушнале дека изјавил дека Никола Груевски имал повисок рејтинг од раководството на ВМРО. Се чини дека Артан Груби сонува за успешна соработка во корупција со Никола Груевски, просрпски, проруски политичар чии последици ги гледаме 10 години по ред“, рече Касами.