Министерството за внатрешни работи на Косово ги оквалификува нападите врз косовската полиција на северот на земјата како оркестрирани од Србија.
„Криминалците ќе бидат идентификувани и изведени пред лицето на правдата. Нападите се оркестрирани и диригирани од Белград“, се вели во соопштението.
Косовската полиција соопшти дека во текот на денот на 31 мај во Лепосавиќ, Зубин Поток и Звечан бил повреден полициски службеник и нападнати три автомобили.
„Ваквите напади се неприфатливи. Овие групи хулигани продолжуваат да докажуваат дека се оркестрирани и диригирани од Белград за да ја дестабилизираат нашата држава“, се вели во реакцијата на МВР, во која се потенцираат и нападите врз припадниците на КФОР и новинарите.
Протестите во четири општини во северно Косово со српско мнозинство почнаа на 26 мај, кога групи локални Срби се собраа пред општинските згради за да протестираат против влезот на новите албански градоначалници на Звечан, Зубин Поток и Лепосавиќ.
Изборите во четирите општини на северот, населени со мнозинство Срби, беа одржани на 23 април по оставката на градоначалниците од редовите на Листа Србска, најголемата партија на косовските Срби, во ноември минатата година. Изборите беа бојкотирани од мнозинското српско население во таа област.