Претседателот на државата Стево Пендаровски синоќа прв го пречека високиот владин претставник на САД, Габриел Ескобар.
“На денешната средба со Габриел Ескобар, заменик помошник државен секретар на САД, разговаравме за македонските аспирации за членство во Европската Унија и за следните чекори коишто треба да ги преземеме како држава, за да напредуваме во процесот. За остварување на нашите стратешки цели, посебно ја цениме поддршката од САД”, изјави Пендаровски по средбата.
На средбата, според соопштението од претседателскиот кабинет, била потврдена поддршката на САД за европските аспирации на нашата земја. Истовремено, било изразено очекување од официјален Вашингтон дека Северна Македонија ќе го продолжи патот кон полноправно членство во Европската Унија.
Претседателот Пендаровски ја истакнал важноста на поддршката којашто САД ја даваат за остварување на стратешките цели на нашата држава. Во таа насока, на средбата се разговарало и за следните чекори коишто треба да ги преземе Северна Македонија со цел да напредува во ЕУ интегративниот процес.
На средбата станало збор и за состојбите во поширокиот регион, во контекст на руската агресија врз Украина.