Иницијативата на Антикорупциската Комисија до Обвинителството го вклучува градоначалникот Стевче Јакимовски и советниците кои учествувале во постапката за изгласување на деталниот урбанистички план. За антикорупционерите, промената на ДУП-от претставува организиран криминал, јави РСЕ.
Државната комисија за спречување на корупцијата ќе бара од Обвинителството за организиран криминал и корупција кривично да ги гони сите кои учествувале во постапка за донесување на деталниот урбанистички план во Карпош за бензинската станица на „Пуцко Петрол“. И тоа во периодот од неговото прво усвојување во 2016 година во мандатот на градоначалникот Стевче Јакимовски, се до неговото укинување по втор пат од Уставниот суд.
На денешната седница, членот на ДКСК, Шемши Салаи, соопшти дека институцијата утврдила состојби кои укажуваат на сомнежи за несовесно работење, искористување на службената положба и овластувања и поткуп.
Покрај кривичната постапка, ДКСК ќе поднесе и претставка до Министерство за локална самоуправа на РСМ, во која ќе бара распуштање на Советот на Општина Карпош, бидејќи го прекршиле членот со кој „повторно го донеле прописот што претходно бил поништен или укинат со одлука на Уставниот суд“.