“Ова постигнување не се состои само од намалување на трошоците, туку ја претставува и визијата на моќта на регионалната соработка”
Како значаен исчекор кон регионална соработка и достапност на мобилната комуникација, Декларацијата за роаминг меѓу ЕУ и Западен Балкан (ЗБ), потпишана на самитот ЕУ-ЗБ во Тирана на 6 декември 2022 година, официјално стапи во сила и го означи 1 октомври 2023 година како ден на промените.
По речиси една година заедничка работа, под покровителство и со поддршка на Советот за регионална соработка ( СРС) и Европската Комисија, како и со политичка поддршка од ЕУ и ЗБ, телекомуникациските оператори како од ЗБ така и од ЕУ, не само што ги исполнија одредбите од Декларацијата, туку во многу случаи и ги надминаа очекувањата.
Од овој октомври горната граница на цените за 1 ГБ податоци во роаминг, во рамки на посебните понуди и пакети, во согласност со Декларацијата за роаминг, не би требало да надмине 18 евра, со што меѓународните патувања и комуникацијата ќе ја направи значително поекономична.
Во многу случаи ограничувањето на цената од 18 евра, во рамки на посебните понуди и пакети, оди и значително пониско, до 1,6 евра за 1 ГБ, додека три оператори од Западен Балкан освен цените во рамки на пакетот, ги намалија дури и редовните цени за дополнителни услуги.
“Ова го најавив речиси пред една година, со зборовите дека “цените на услугите за роаминг меѓу ЕУ и ЗБ ќе паѓаат со есенските лисја” и, ако некој се сомневаше, мило ми е што денеска моите зборови го убедуваат. Овој клучен настан веќе ја менува сликата за размена на мобилни податоци за граѓаните и патниците. Успехот на Декларацијата за роаминг меѓу ЕУ и Западен Балкан сведочи за моќта на регионалната соработка која ја менува комуникацијата на подобро и покрај соочувањето со сложени предизвици. Оваа пресвртница доаѓа во момент на политички тензии, економски превирања и се поширок спектар на климатски промени во регионот, со што уште повеќе се нагласува важноста на регионалната и евроатланска соработка”, изјави генералниот секретар на Советот за регионална соработка, Мајлинда Брегу. “Додека го славиме ова постигнување, им оддаваме признание за посветеноста на сите вклучени страни, посебно на телекомуникациските оператори, и се радуваме заради подобро поврзаната, подостапна и попристапна иднина за сите”.