Легендата на Милан и италијанската репрезентација Франко Барези почина на 66-годишна возраст, соопшти во петокот италијанскиот клуб, без да ја наведе причината за смртта.
„Милан тагува поради заминувањето на Франко Барези. Неговиот пример и интегритет засекогаш ќе останат врежани во ДНК на клубот, исто како и неговиот легендарен дрес со број 6“, соопшти Милан.
Во емотивната порака клубот наведе дека Барези бил „срцето и душата на Милан“ и потсети дека неговото последно јавно појавување било пред неколку месеци на свеченото отворање на Зимските олимписки игри во Милано и Кортина, на преполниот стадион „Сан Сиро“.
Барези целата своја професионална кариера ја мина во Милан. Во младинската академија пристигна во 1974 година, а за првиот тим дебитираше во 1978 година. На само 22 години ја доби капитенската лента, која ја носеше повеќе од една деценија.
Во текот на 20-годишната кариера одигра 719 натпревари за Милан, освојувајќи шест титули во Серија А, три европски шампионски титули, два Интерконтинентални купа и бројни домашни трофеи. По неговото пензионирање во 1997 година, Милан го повлече од употреба неговиот дрес со број 6.
Заедно со Паоло Малдини, Мауро Тасоти и Алесандро Костакурта ја сочинуваше една од најсилните одбранбени линии во историјата на европскиот фудбал и беше клучен играч во славната генерација на тренерот Ариго Саки.
За репрезентацијата на Италија настапи 81 пат, беше дел од тимот што ја освои светската титула во 1982 година, а како капитен ја предводеше Италија до финалето на Светското првенство во 1994 година, каде што „азурите“ загубија од Бразил по изведување пенали. Настапи и на Мундијалот во 1990 година, на кој Италија го освои третото место.
Од 2020 година Барези ја извршуваше функцијата почесен потпретседател на Милан. Во 2025 година тој беше опериран поради белодробен јазол, по што изјави дека ќе му биде потребно време целосно да закрепне.
Барези останува запаметен како еден од најголемите стопери во историјата на фудбалот, играч чија визија, лидерство и тактичка интелигенција оставија траен белег врз модерната дефанзивна игра.